Once Were Warriors by Alan Duff

Alan Duff ၏ ၁၉၉၀ ခုနှစ်တွင် ထွက်ရှိခဲ့သော ပထမဆုံး ဝတ္ထုရှည် ဖြစ်ပြီး၊ နယူးဇီလန်ရှိ မြို့ပြဒေသမှ မာအိုရီ (Māori) တိုင်းရင်းသား မိသားစုတစ်စု၏ ကြမ်းတမ်းသော ဘဝအမှန်ကို ပြတ်ပြတ်သားသား ပုံဖော်ထားသည့် ဝတ္ထုဂန္ထဝင်တစ်အုပ် ဖြစ်ပါတယ်။

ဝတ္ထု၏ အဓိကဇာတ်ကောင်များမှာ Heke မိသားစုဖြစ်ပါတယ်။ ဖခင်ဖြစ်သူ Jake “The Muss” Heke သည် အလုပ်လက်မဲ့ဖြစ်ပြီး အရက်သေစာသောက်စားကာ အိမ်တွင်းအကြမ်းဖက်မှု ကျူးလွန်တတ်သူ၊ စိတ်လိုက်မာန်ပါဖြစ်တတ်သူ ဖြစ်ပါတယ်။ ဇနီးဖြစ်သူ Beth Heke သည် ရိုးရာအစဉ်အလာရှိသော မာအိုရီမျိုးရိုးမှ ဆင်းသက်လာသူဖြစ်ပြီး၊ ခင်ပွန်းသည်၏ ရိုက်နှက်မှုနှင့် စိတ်ဒဏ်ရာများကို ခံစားနေရသော်လည်း မိသားစုကို ရအောင်ထိန်းသိမ်းဖို့ ကြိုးစားနေသူ ဖြစ်ပါတယ်။

သူတို့၏သားသမီးများဖြစ်ကြသော Nig သည် မိသားစုမှ ထွက်ခွာပြီး လူဆိုးဂိုဏ်းထဲ ရောက်သွားခြင်း၊ Boogie သည် ပြစ်မှုငယ်များကြောင့် ပြုပြင်ရေးကျောင်းသို့ ပို့ခံရခြင်း၊ ငယ်ရွယ်သော သမီးလေး Grace သည် စာပေနှင့် စိတ်ကူးယဉ်ကမ္ဘာတွင် လွတ်မြောက်ရာ ရှာဖွေရင်း ဘဝ၏ အကြမ်းဖက်မှုများကြောင့် ကြေကွဲဖွယ် အဆုံးသတ်သွားခြင်း စသည့် ဖြစ်ရပ်ဆိုးများဖြင့် Heke မိသားစု၏ ဘဝမှာ ပျက်စီးယိုယွင်းလျက် ရှိပါတယ်။

စာအုပ်အမည် ‘Once Were Warriors’ (တစ်ချိန်က စစ်သည်တော်များ) သည် မာအိုရီလူမျိုးတို့၏ ဂုဏ်ယူဖွယ် စစ်သည်တော် ယဉ်ကျေးမှုနှင့် ရိုးရာဓလေ့ကို ရည်ညွှန်းပြီး၊ မျက်မှောက်ခေတ်တွင်မူ ဆင်းရဲမွဲတေမှု၊ ယဉ်ကျေးမှု ကင်းကွာမှုနှင့် ကိုလိုနီစနစ်၏ နောက်ဆက်တွဲ ဆိုးကျိုးများကြောင့် မာအိုရီလူမျိုးအချို့ ကြုံတွေ့နေရသော ဘဝ၏ ခါးသီးသော အမှန်တရားများကို ထင်ဟပ်စေပါတယ်။ သို့သော် ဝတ္ထု၏အဆုံးတွင် Beth Heke သည် သူမ၏ မာအိုရီအမွေအနှစ်နှင့် ယဉ်ကျေးမှု အမြစ်များဆီ ပြန်လည် ဆက်သွယ်ကာ မိမိကိုယ်ကိုနှင့် ကျန်ရှိသော မိသားစုဝင်များကို ကြမ်းတမ်းသော ဘဝစက်ဝန်းမှ ရုန်းထွက်နိုင်ရန် ခွန်အားရှာဖွေပုံကို စိတ်လှုပ်ရှားဖွယ် ရေးသားထားပါတယ်။

ဤဝတ္ထုသည် ထွက်ရှိပြီး မကြာမီပင် နယူးဇီလန်၏ အရောင်းရဆုံး စာအုပ်ဖြစ်လာခဲ့ပြီး နိုင်ငံတကာတွင်လည်း အလွန်အောင်မြင်ခဲ့ကာ ၁၉၉၄ ခုနှစ် တွင် ရုပ်ရှင်အဖြစ် ရိုက်ကူးခဲ့ရာ ထိုရုပ်ရှင်သည်လည်း နိုင်ငံတကာမှ ချီးကျူးဂုဏ်ပြုမှုကို ရရှိခဲ့ပါတယ်။