မန်ဂါလောကမှာ လွန်ခဲ့တဲ့ နှစ်နှစ်လောက်ကစပြီး နာမည်အကြီးဆုံး စကားစမြည်တစ်ခုက Kagurabachi ပါ။ Shonen Jump မှာ စတင်ချိန်ကတည်းက အင်တာနက်ပေါ်မှာ meme ဖြစ်လာပြီး၊ အဲဒီနောက်မှာတော့ meme သက်သက်မဟုတ်ဘဲ တကယ့်စာအုပ်ကောင်းတစ်အုပ်ဆိုတာ ဖတ်သူတွေ ကိုယ်တိုင် အသိအမှတ်ပြုလာခဲ့ကြပါတယ်။ ဆိုင်မှာလည်း အခု လအနည်းငယ်အတွင်း အမေးအများဆုံး manga တွေထဲ ပါလာပါပြီ။
ဇာတ်လမ်းက ရိုးရှင်းပြီး ပြင်းထန်ပါတယ်။ Chihiro ဟာ ဂျပန်တစ်နိုင်ငံလုံးက အသိအမှတ်ပြုတဲ့ ဓားဆရာကြီးရဲ့ သားဖြစ်ပြီး၊ အဖေနဲ့အတူ ဓားလုပ်ငန်းကို အေးအေးဆေးဆေး သင်ယူနေသူပါ။ တစ်နေ့မှာတော့ အဖေဟာ သတ်ခံရပြီး သူ ပြုလုပ်ခဲ့တဲ့ မှော်ဓားတွေလည်း ခိုးယူခံရပါတယ်။ ကျန်ခဲ့တာက ဓားတစ်လက်နဲ့ လက်စားချေဖို့ ဆုံးဖြတ်ချက်တစ်ခုပါပဲ။
Takeru Hokazono ရဲ့ ပုံဆွဲဟန်က ဒီစာအုပ်ရဲ့ အဓိက အားသာချက်ပါ။ ဓားခုတ်ချက်တွေကို စာမျက်နှာတစ်ခုလုံး ဖြတ်ထွက်သွားတဲ့ မျဉ်းတွေနဲ့ ပြထားတာက ရုပ်ရှင်ကြည့်နေသလို ခံစားရစေပါတယ်။ Action မန်ဂါ အသစ်တစ်ခု စဖတ်ချင်နေသူတွေအတွက် အခုအချိန်မှာ ဒီထက်ကောင်းတဲ့ အစပြုစရာ မရှိသလောက်ပါပဲ။
ဇာတ်လမ်းအရှိန်ကလည်း မြန်ပါတယ် — Vol.1 ထဲမှာပဲ ဇာတ်ကောင်၊ ရန်သူ၊ ရည်မှန်းချက် အားလုံး ရှင်းရှင်းလင်းလင်း ချပြပြီးသားပါ။ အခန်းရှည်ကြီးတွေ စောင့်စရာမလိုဘဲ ချက်ချင်း ဇာတ်ထဲ ဝင်သွားနိုင်ပါတယ်။
ဒါက ဆက်လက်ထွက်ရှိနေဆဲ စီးရီးရဲ့ ပထမတွဲပါ။ Jujutsu Kaisen ဒါမှမဟုတ် Chainsaw Man ကြိုက်ခဲ့သူဆိုရင် ဒီစာအုပ်ကို လက်လွတ်မခံသင့်ပါဘူး။
Junction City စတုတ္ထထပ် · 09 698 706 533
နေ့စဉ် နံနက် ၉:၀၀ – ည ၇:၀၀