Nakamura ဟာ ရေဘဝဲတွေကို အသည်းအသန် ချစ်တဲ့၊ ရှက်လွန်းလို့ လူတွေနဲ့ စကားတောင် ကောင်းကောင်း မပြောရဲတဲ့ ကျောင်းသားလေးပါ။ သူ့မှာ လျှို့ဝှက်ချက်တစ်ခု ရှိပါတယ် — အတန်းဖော် Hirose ကို တိတ်တိတ်လေး ကြိုက်နေတာပါ။ ပြဿနာက ချစ်သူဖြစ်ဖို့ဆိုတာ ဝေးလို့ သူငယ်ချင်းတောင် မဖြစ်နိုင်သေးတာပါပဲ။
ဒီစာအုပ်တစ်အုပ်လုံးဟာ Nakamura ရဲ့ ‘ဒီတစ်ခါတော့ စကားပြောမယ်’ ဆိုတဲ့ ကြိုးစားမှုတွေနဲ့ အဲဒီကြိုးစားမှုတိုင်း ရယ်စရာကောင်းအောင် ပျက်သွားတာတွေကို လိုက်ကြည့်တာပါ။ ဖတ်ရင်း ရယ်ရပေမယ့် လှောင်တဲ့ရယ်သံမျိုး မဟုတ်ပါဘူး — ရှက်တတ်တဲ့သူတိုင်း ကိုယ့်ကိုယ်ကို ပြန်မြင်ရလို့ ရယ်ရတာပါ။
Syundei ရဲ့ ပုံဆွဲဟန်က 90s retro anime ကို သတိရစေပြီး၊ အဲဒီနွေးထွေးတဲ့ အသွင်အပြင်က ဇာတ်လမ်းရဲ့ နူးညံ့မှုနဲ့ လိုက်ဖက်ပါတယ်။
BL လို့ တံဆိပ်ကပ်ထားပေမယ့် အချစ်ဇာတ်ကွက်ထက် comedy နဲ့ coming-of-age အပိုင်းက ပိုများပါတယ်။ ဘယ် genre ဖတ်သူမဆို သက်တောင့်သက်သာ ဖတ်နိုင်တဲ့ စာအုပ်ပါ။
ဒါက ပထမတွဲပါ။ တစ်နေ့တာရဲ့ စိတ်ဖိစီးမှုကို မိနစ်သုံးဆယ်အတွင်း မေ့သွားစေချင်ရင် ဒီစာအုပ် ကောက်ကိုင်လိုက်ပါ။
Junction City စတုတ္ထထပ် · 09 698 706 533
နေ့စဉ် နံနက် ၉:၀၀ – ည ၇:၀၀